مشيت نزور مرأة كبيرة فالعمر تنعرفها من وأنا صغيير بزاف... تيقولو عليها شوافة (عرافة) ولكن هي عمرها قالت اني عندي الجواد او تنتعامل مع الجن، هي قلبها طيب وابيض ومستحيل ماتبغيهاش الى شفتيها وانا تنقول ان عندها الحكمة وفيديها البركة.. الحكمة لي اكتسبتها من الحياة والمعاناة لي دوزات.. ومعندها حتا ارتباط بالدين او الشعوذة. فرحت بزااف ملي شافتني، بست ليها راسها وجلست حداها وحطيت راسي على كتفها وبدات تتلعب لي بشعري كيف ديما وتغنيلي وحدة من التهويدات لي كانت تتعجبني فصغري (اِزران بالريفية) وخا متنفهمش لكن المعنى كان تيوصل لقلبي وتنرتاااح ويديني النعاس... صوتها تيخليني نترفع ونحس بقلبي عايم فالهوا.. قالت لي كبرتي ا محمد ونتا عندي عزيز وتنفرح فاش تنشوفك غادي بخير فحياتك وديما غندعيلك وتندعيلك بالنجاح.. قالت لي اجي نحكيلك سر يبقا بيناتنا، ولادك تنشوفهم قراب ليا بزاف وتنسمع صوتهم فودني ونتا تتغني ليهم.. قالت لي بلي غتكون عندي بنت هي الاولى وجوج دراري عاد بنت اخرى هي الاخيرة... ضحكت بزااف والضحكة كانت خارجة من الأعمااق حيت مخلطة بالسعادة، غمضت عيني وسمعت ضحكة ديال طفل صغير والغريب انها كانت حقيقية لدرجة مخيفة بزااف. فرمشة عين تحولت من السعادة للحزن ومن دموع الفرح لدموع الندم.. اااااه وقداش كنت حمق وانا تنقول للناس اني مباغيش اولاد وأني غنكون بخير بلا بيهوم، معرفتش علاش مفكرتش فهاد اللحظة التاريخية... بنتي العزيزة منكدبش عليك وغنصارحك اني كنت تنتمنا طفلي الاول يكون ولد... يورث مني كاع الطقوس ديالي الغريبة ومعاه نخرج الحمااق لي فيا ونوريه العالم ونعلمو كفاش يكون انسان، ولكن.. اليوم كلشي تخلط علي، تخربقت بسبب هادشي لي سمعت.. اليوم حسيت بكفاش يمكن للانسان يتولد من جديد، انا كنت هو هداك لي متيشوف فالدراري الصغار الا انهم مخلووقات صغيرة تتفيقنا مع الجوج دلييل حيت بغات تخسر لينا نعاسنا. بنتي.. تنبغي نقولك انك مغتلقايش مشكل معيا من هاد الناحية، حيت اصلا انا كائن ليلي، غنقصرو بجووج ونشربك القهوة بلا خباار ماماك وعارفك مغتقوليهاش ليها هههههه وهدا غيكون اول سر لينا.. غنسد الباب ونطلق الموسيقى على الجهد ونبداو نقزو حتا يفيقو الجيران ههههه.. من دبا بديت تنحس بالغيرة حيت غتبغي ماماك كتر مني ولكن غندير لي جهدي باش نخليك تبغيني كتر... بنتي.. معمرني غنحس بالمعنى ديال الوطن حتا نشد فصبيعاتك الصغاااار، ديك اللحظة وفقط غنحس بالانتماء للوطن.. وغنموت بالضحك فاش نشوفك تضحكي معندكش سنينات وفمك تيبان بحال ديال جداتي ملي تتنسا تركب الفم ديالها هههههههههه سمحيليا ابنتي ولكن مغنقدرش نحبس الضحكة هههههه وغنشد فيديك ونكون معك نوجهك فاش نشوفك وصلتي للمراهقة والعالم تيحاول يهدم داكشي لي بنيناه انا وياك من مبادئ و أخلاق وانسانيات.. معمري غنقولك ماديريش هادشي حيت نتي ماشي ولد او ديري هادي حيت نتي بنت، تنفكر بزااااف كفاش نخلي العالم مكان آامن ليك وحتا دبانة متقدر تعضك او تآديك. غنعنقك.. ويمكن غنخبيك فقلبي ولو ثانية باش نبعدك على اي شر فهاد الكون...
